BİZƏ ƏN YAXIN OLAN BİRİSİ...

     

    Sevdik  həyatı. Bağlandıq  ona. Dördəlli  sarıldıq  dünyaya.  Zahirini  

düşündük,  mahiyyətini   unutduq  yaşamın.  Yaxınlarımız,  doğmalarımız  üçün  nəfəs  
aldıq.  Yaşadaraq   yaşadıq.  Çox  vaxt  fədakarlığımız, sevgimiz   ifrata  vardı.  
Özümüzü  unutduq.  Həyatı,  dünyanı,  doğmalarımızı, sevdiklərimizi,  dostlarımızı   
ən  yaxınımız  sandıq.  Amma...  Amma...  Zaman-zaman  ən  böyük   zərbələri  də,  
məhz  onlardan  aldıq. SƏMİMİYYƏTİMİZ,  yaxınlarımız  dediklərimizin  önündə  bir  
aynaya   döndü.  GERÇƏKLƏRİ   gördükcə,  acıdıq   özümüzə. Bitməz   suallar,  
tükənməz  təzadlarla  dolu  həyatda  ən  yaxınımız  biləcəyimiz,  güvənəcəyimiz   
və   bizi   hər  an  kölgə  tək  izləyən  tək  gerçək   var:-"ƏMƏLLƏRİMİZ  və   KƏFƏN"


                                                                 YAQUT   HÜSEYNOVA

ZÜLMƏTİN SÖYLƏDİKLƏRİ...

  Gecələrin  zülmətində  aydınlanar  dünyanın  iç  üzü. Ulduzlar  sətirlərinə  dönər,
Yaradanın  bizə  çatdırmaq  istədiyi  həqiqətin. Çözülər  həyatın  uyduğumuz  
yalanları. Dil  açıb  danışar,  bizimlə  zülmət  qaranlıq. Öz   dilində  nəql  edər, 
dünyanın  batilini  içində  gizlətdiyi  zahiri  "kəhkəşan"ını. Kimi sevərək  dinlər
bu  gerçəyi, kimi  isə  bilərəkdən  qulağını  kar  edər  eşitdiklərinə!

    SEVGİ,  dənizlərin  dalğalarında  saflaşar. Kin-küdurət, içimizdəki  bütün
mənfiliklər  dağlardan  qopub  parçalanan  daşlar, çınqıllar  tək  tökülər 
ayaqlar  altına. Təbəqələşən  cəmiyyət  eyniləşər  bu  zülmətdə. Gözlərimizin
əbədi   uyuyacağı  röyada  hər  bir  yaradılışın  bir  gün  İLAHİ  VARLIQ
qarşısında  dayanacağını  dönə-dönə  xatırladar. Keçdiyimiz  tale  yolunun,
yaşadığımız  anların, bizi  addımbaadım  izləyən  yalanın, gerçəyin, ötəri
xoşbəxtliyin,  unudulmaz  acıların   hesabatını  dinlətdirər  özümüzə. 
Dinlədikcə, dünyəvi   aldanışlarımıza  acıyarıq. Qaçmaq  istəyərik  özümüz-
özümüzdən. Amma... Nədənsə  bunu  unudarıq. Unudarıq  ki, hara  üz  tutsaq  
da, hayana  qaçsaq  da,  getməz  əməllərimizin  qulaqlarımızdakı  əks-sədası. 
   Mənəvi  dirçəlişimizi   arayarıq.  Aradığımız  huzurun  haqqı  tanımaqda,
haqqa  tapınmaqda  olduğunu  dərk  edərik. Və  bu   dərk   etmə  içtənliklə
dəyişdirər  hər  birimizi.  
   Həyatın  gözqamaşdıran  cah-cəlalında  dəfn  etdiyimiz   özümüzü  yenidən
dirildər,  kainatın  tək  gerçəyi  olan  İLAHİ  EŞQ!  Qəlbimizi, baxışlarımızı,
duyğularımızı, sönməz  nurunda  aydınladaraq, içimizdəki  zülməti  parçalayaraq
yolumuzu  işıqlı  sabahların  DAN  YERİNƏ  qovuşdurar   UCA  YARADAN! 
Bir  ümid  sarar  ətrafımızı:
   -"Qoy, torpaqdan  xəlq  olub, ünvanı  HAQQA  doğru  olan  yolumuz  saflıq, 
səmimiyyət  və  TANRI   SEVGİSİYLƏ   rənglənsin, AMİN!"

                                                  YAQUT   HÜSEYNOVA

"QƏLBİMDƏKİ SƏN TƏZADI"

      Həyat  çox  qəribədir.  SEVGİNİ- dəyərini  bilməyənə  bəsləyirik!!!  Zaman  
keçdikcə  qəlbimizdəki  gerçək  eşqin  həqiqətdə, təzaddan  başqa  bir  şey  
olmadığına  varırıq. Gözlərimizi, ürəyimizi  varlığıyla  nə  qədər  qamaşdırsa  
da,  birgə  addımladığımız  yollarda  bunun  yalnız  və  yalnız  zülmətdən  ibarət  
olduğunu  anlayırıq. Mahiyyətini  dərk  etdikcə  susqunluğumuz  da artır. Sakitcə  
iç  dünyamıza  çəkilirik, qəlbimizdəki məhəbbətdən   belə   xəbərsiz!
   

 
    Yenidən  arzulara  qayıtmaq, yenidən  xəyallara  sarılmaq, yenidən  içimizdəki  
həyat  eşqinə  ümidlərlə  bağlanmaq, keçilməz  səd  kimi  çəkilir  duyğularımıza. 
Şirin  bir  röyamıza  dönər  sevgi. Arzusunda  olduğumuz  səadət  dolu  bir  röyaya. 
Kaş  bu  röyadan  heç  vaxt  ayılmazdıq...
     Bəzən   "KAŞ"  və  "BƏLKƏ"   kəlmələrini   dilimizə   öyrətsə  də  SEVGİ,  
qəlbimizin dərinliyində  məskən  salmış   əbədi  gerçəyimizdi! Və  bu  gerçəyin  tək  
adı  var:-"TANIDIĞIM  və  TANIMADIĞIM  SƏN!"

                                                               YAQUT  HÜSEYNOVA 
   

SƏNƏ QƏDƏR!

    SƏNƏ  qədər  bir  dünyam  vardı... Duyğularımın, xəyallarımın, arzularımın,
kədərimin  köksündə  dilləndiyi  ağ  vərəqlər  idi,  bu  dünyamın  sonsuz  
üfüqləri!
    SƏNƏ  qədər  bir  röyam  vardı... Mənimlə  birlikdə  addımlayan, tale
yollarımı, həyata  eşqimi  "qaranlıq  işığ" ıyla  nurlandıran  qələmim  idi,
bu  röyamın  səadəti!   
   

  
    SƏNƏ  qədər  könül  verdiyim, qəlbimin  rahatlıq  tapdığı  bir  həqiqətim
vardı...  Torpağın, asimanın, Günəşin, dənizin, bir  də  rüzgarların  pıçıltısını
ləçəklərində  dinlədiyim  SARI  ÇİÇƏKLƏR  idi,  mənim  üçün  səmimiyyət
və  saflığın  ünvanı!
    Bir  nağıl  tək  gəldin  ömrümə... "BİRİ  VARDI, BİRİ  YOXDU"  sözləriylə
başlayıb  və  bu  kəlmələrlə  bitsə  də  gerçək  bir  sevgi  nağılım  oldun.  
Varlığımı   onun  sətirlərində  tapdım  səssizliyimlə, sükutumla. SEVDİM,
SEVİLDİM!
     Ağ  vərəqlər, qələmim, bir  də  çox  sevdiyim  SARI  GÜLLƏR  idi,  həyatımın
huzuru. Və  bu  huzurun  tamamı  SƏN   oldun!

                                                                 YAQUT   VAFİQQIZI

Cəmi 19 il yaşadı...

     1975-ci  il  martın  1-də  Əli Bayramlı  şəhərində  dünyaya  göz  açmışdı  Bəhruz  
Aslanov. Xarakteri  və  vətənpərvərliyi  ilə  hər  kəsin  sevimlisi  idi. O,  Əli Bayramlı
şəhər  Hərbi komissarlığı  tərəfindən  1993-cü  il  avqust  ayında  hərbi  xidmətə  
çağırılır. Qanlı-qadalı  illərin  olmasına  baxmayaraq, Bəhruz  bu  çağırışdan  
yayınmır. Valideynlərinin xeyir-duasıyla hərbi  xidmətə  yola  düşür. Bakıda və  
Gəncədə  hərbi  təlim  keçdikdən  sonra   döyüş  bölgəsinə  göndərilir. Füzuli  
rayonunun   Əhmədbəyli, Qaraxanbəyli, Kürdmahmudlu   kəndlərinin  düşməndən  
azad  olunması uğrunda  gedən  döyüşlərdə  iştirak  edir. Onun  axrıncı  döyüşü  
isə Aşağı  Seyidəhmədli  kəndində  oldu.

       Cəmi  19  il  yaşadı...  Amma  ölümüylə  ürəklərə   köçdü  əziz  xatirəsi. Şirvan  
şəhər  16  nömrəli  tam  orta  məktəbdə  şəhidin  anım  günü  keçirildi. Şəhidin  ailə
üzvlərinin  iştirak   etdiyi   tədbirdə  məktəblilərin  hazırladığı  "Şəhidlər  ölməz, 
Vətən  bölünməz!" adlı  ədəbi-bədii  kompazisiya  qonaqlara  təqdim  
olundu. Şəhidin  19  illik  qısa, lakin  şərəfli   ömrünü   işıqlandıran  şeir  və  
səhnəciklər  hər  kəsi  kövrəltdi.  Məktəbin   ibtidai  sinif  müəllimi   Xavər  
Rəhimova  şəhidə  həsr  etdiyi  "Şəhidim  laylay" şeirini  səsləndirdi.

     Şəhidin  atası   Misir  Aslanov  öncə  məktəb   rəhbərliyinə  diqqətə  görə  
təşəkkürünü bildirdi. Oğluyla  bağlı  xatirələrini  dilə   gətirdi. Gənc nəslə 
şəhidlərimizin  həyatının  bir  örnək  olduğunu  vurğuladı.  
      Məryəm  Aslanova  da  oğlunun  anım   gününə   həsr   olunmuş   tədbiri  
yüksək  dəyərləndirdi. Göz  yaşlarını  gizlədə  bilməyən  şəhid  anası  Bəhruzlu  
günləri  qəlbinin  ağrısıyla   dilləndirdi.  
       Mərasimdə  məktəbin  direktoru  Çingiz  Şirəliyev  və  jurnalist  Yaqut  
Vafiqqızı  çıxış  etdi. Sonda  Bəhruz  Aslanovun xatirəsinə ittihaf  olunmuş
slayd  nümayiş olundu.


                                                                     YAQUT    HÜSEYNOVA 

Şirvan məktəbliləri daha bir konfransa yollanacaq.

AZETA  Azerbaijan  (Azərbaycan  İngilis  dili  Müəllimləri  Assosasiyası)  2006-cı  
ildən  fəaliyyət göstərir. Bu qurumun  şəhərimizdə özək  təşkilatı  2012-ci  ildə 
yaradılıb. AZETA   SHİRVAN BRANCH  yarandığı  iki  il  ərzində  bir  çox  
layihələrdə  uğurla çalışır. Bu proqramlardan  biri də  EAMP- English  Access  
Microschoolarship layihəsidir. Layihənin  əsas  məqsədi  bölgələrdə olan  
aztəminatlı  ailələrin uşaqlarına  ingilis  dilini  dərnəklər  vasitəsilə öyrətməkdir. 
Amerika Departamentinin  maliyyə  dəstəyilə  reallaşdırılan  EAMP  artıq 
neçə-neçə  məktəblinin  ingilis dilinin  bütün  incəliklərini  mənimsəməkdə  
ən  yaxın  yardımçısıdır. 21 saylı  tam  orta  məktəbin direktoru  Səadət  
Quliyevanın  rəhbərlik  etdiyi  AZETA   SHİRVAN  BRANCH-ın   adıçəkilən 
dərnəklərində  12  şagird  dil  öyrənir. Dərsləri  ingilis  dili  müəllimi  Nəzakət  
Səmədova  keçir.

Həftədə  iki  dəfə  keçirilən  
dərnəkdə  əsas   dərslik  
"Cuttinq  Edge"  kitabıdır.
AZETA  Azerbaijan  təşkilatının  
prezidenti Rəqsanə  
Məmmədova  və təşkilatın 
yaradıcılarından  olan  
Südabə Sadıqın iştirakıyla   
AZETA  SHİRVAN BRANCH-ın   
EAMP  uşaqları   "Earth  Day"  
keçirdilər. Məqsəd  məktəblilərdə  
humanistlik, vətənpərvərlik, 

Yer  kürəsinə  və  təbiətə  sevgi  aşılanması  idi. Şagirdlər  əvvəlcə məktəbin  və  
onun  həyətyanı  sahəsini təmizlədilər, yeni  ağac  və  gül  kolları  əkərək onları  
suvardılar. Açıq  səma  altında  uşaqlarla   aparılan   fikir  mübadiləsi   qonaqlarda  
yüksək  təəssürat  oyatdı. Və  dərnəyin  altı  üzvi  aprel  ayında  Bakıda keçiriləcək  
EAMP  uşaqlarının  XI  konfransına  seçildi.


                                                              YAQUT  HÜSEYNOVA    

Mingəçevirdə "Mobil Jurnalizm" təlimi keçirildi.

Mingəçevir  Media  mərkəzində  İREX  Azərbaycan  təşkilatının  dəstəyilə  "Mobil 
Jurnalizm" layihəsi üzrə  treyninq (10-12 aprel 2014-cü  il)  keçirildi. Böyük  
Britaniyalı  jurnalist  Dan  Maysonun  bu  təlimində respublikamızın   müxtəlif  
regionlarından  olan jurnalistlər,  QHT   nümayəndələri  və  tələbələr  iştirak  
edirdi.

    "Mobil  Jurnalizm  platforması  üzərində  jurnalistika"  haqqında  ətraflı  bilgi 
 və məlumatları   Dan  Mayson  bütün   incəliklərinə  qədər   iştirakçılara  izah  
etdi.  Təlimin əsas məqsədi  jurnalistlərə, bloqçulara, PR  peşəkarlara  və  
mütəxəssislərə  Yeni  Medianın   bacarıqlarını   öyrətməkdir, söyləyən  İREX-in   
əməkdaşı Natella  Abdullayeva  treyninqin  əhəmiyyətindən   danışdı. O   qeyd  
etdi  ki,  mobil   jurnalistika  daha  operativ  işləmək   üçün media
nümayəndələrinə  əlverişli   zəmin  yaradır. 

İştirakçılar  iphone  və  android   əməliyyat  sistemlərini  dəstəkləyən  mobil  
telefonlarının   vasitəsilə   video  sujet   hazırlamaq, audio  müsahibə  almaq, 
onları  redaktə   etmək  və  internet  saytlarında  yerləşdirməyi öyrəndilər. 
Təlimdə Şirvan şəhərindən İREX-in bölmə rəhbəri  Alma  Cəfərova, Heydər 
Cəfərov  və jurnalist  Yaqut  Hüseynova  iştirak  edirdi. 


                                                              YAQUT  HÜSEYNOVA

QƏLBİMDƏKİ SƏN.

 

       Masmavi  dənizin  qırçın  ləpələrinə qarışıb  xəyallarım. Dalğalar  bir-birini  
qovaraq, sanki  harasa  tələsir. Bəyaz  qağayılar  uçuşur  sahildə. Dənizi  çox  
sevirəm. Saatlarla  dayanıb  mavi   dalğaların   sahilə  necə  can atdığını  seyr  
etməkdən  doymaram. Həzin  küləkli  sahildə  yenə  SƏNLİ  düşüncələr  sarıb  
dörd  bir  yanımı. Hər an xəyallarımda, arzularımdasan. Düşüncələr  qəlbimizin,
ağlımızın  bəzən  huzur yeri, bəzən  kədər  yükü, bəzən  də  sevinc  adlı  nəğməsidi.
Çox vaxt  sükuta  dalar insan, susar  saatlarla. Amma... Amma  hayqıraraq  danışar
qəlbiylə. Nəğmələrin ahəngində yox olar duyğularımız. Özümüzə  yolçuluğumuz  və
ruhumuzun rahatlığı, məhz  səssizliyimizdir.  
    Şirin  xəyallarımdan  qopan  bir  damla  dalğalara  qərq  olub. Qəlbinlə dinlə, 
onun səsini:-"Mavi  dənizin  sahilində  sevgimizin  nurlu   sabahlarına   birgə  
yola çıxaq. Bəyaz  qağayıların  ləpələrə  qarışan  sevgi  nəğməsini  birlikdə 
dinləyək. Həzin küləklər  olsun  şahidimiz. Və gözlərinə  baxaraq   
SEVDİYİMİ  söyləyim!..

                                                         YAQUT   HÜSEYNOVA

Şəhid Fərid Əhmədovun nənəsinin yarın qalmış arzusu- Bir çiçəyin nağılı...

       Şəhid  Fərid  Əhmədov... Azərbaycanın qəhrəman oğlu... Artıq onun şəhid 
olmasından illər ötüb. Amma əziz  xatirəsi  xalqımızın  qəlbində əbədi yaşayacaq. 
Şəhidlər azadlıq uğrunda cihada qalxaraq  əbədiyyətə vardılar. Fərid Əhmədovun 
yas mərasimində Şirvan şəhər "SEVİL" qadınlar cəmiyyəti olaraq iştirak edəndə 
şəhidin nənəsinin  xatirələri hər kəsi kövrəltdi. Nənə yarın qalmış arzusunu belə 
dilə gətirdi:

    
   -"Oğlum Güloğlan çox həyatpərvər  və sevgi dolu idi. Həyətimizdə gördüyünüz 
bu güllər  onun  arzularının  acı xatirəsidi. Hər zaman  tükənməz sevgiylə onlara 
qulluq edərdi. Mən də həmişə gileylənirdim ki, oğul özünü niyə belə yorursan. 
O isə cavabında gülərək yanıma gəlib deyərdi ki, ana, bu gülləri  gözəl  bir  arzuyla 
böyüdürəm. Allahdan tək  diləyim  FƏRİDİN toyunda bu  çiçəkləri  sevinclə, 
səadətlə bəzəyək.  Bax, o  gün  bu  çiçəklər  daha gözəl  olacaq..." Sən saydığını 
say, gör  fələk  nə sayır! Bu  güllər  əvvəlcə oğlumun,  sonra  nəvəm  FƏRİDİN   
yasına  göz  yaşı  tökdü. Hər  onlara   baxanda  ürəyim   qübarlanır , bir yandan 
da elə  bilirəm  ki, FƏRİD  üçün  hələ  bu  çiçəkləri  bəzəyəcəyik..."

                                                                   YAQUT  HÜSEYNOVA     

BİR SEVGİ YAŞADIQ...

Sən mənim qəlbimin dərinliyində,
Bir ülvi sevgiylə SONSUZA vardın!
Ən şirin arzumun ənginliyində,
Yaralı könlümü ümidlə sardın.

             Bir SEVGİ yaşadıq... Səssiz-səmirsiz...
             Biz susduq... Danışdı ürəklərimiz!
             Bir SEVGİ yaşadıq... Səssiz-səmirsiz...
             Biz susduq... Danışdı diləklərimiz!

Əl-ələ bir dünya qurmaq istədik,
Səadət evimiz oldu ayrılıq!
Bir isti ülfətlə qısaltdığımız,
Birgə yolumuzu yordu ayrılıq!

          "BƏLKƏ" lər ittiham etdi eşqimi,
          "KAŞ" larda  çözüldü düşüncələrim!
           Gözləyir  yolunu heç yorulmadan,
           Ötən hər səhərim, həm gecələrim!
        

                                                                
                                                                         YAQUT HÜSEYNOVA