AĞRILAR İÇİNDƏ QIVRILAN İKİ QIĞILTI...

     Yaxınlarımdan   birinin   körpəsini   ziyarət   etmək   üçün   onların   müalicə   
olunduğu  xəstəxanaya   yollandım . Orada   gördüklərim   məni   dəhşətə   gətirdi . 
İçin - için  sızıldadı  qəlbim . Düşüncələrim   bir   fırtına  tək  gözlərimdən   damla - 
damla  axdı ...

     Şöbəni   körpələrin   şirin   qığıltısı   və  gülüşləri   bürümüşdü . Həmin gün 
həkimin  qapısı   önündə   nə   qədər   valideyn   öz   növbəsini   gözləyirdi   ki , 
uşaqlarını  müayinə   etdirsin . Birdən   hər   kəsin    diqqətini    bir    ananın   
sakit - sakit   ağlamaq  səsi  çəkdi .  Ana    körpə   balasını   bağrına   sevgi   
və   nəvazişlə   basaraq   göz  yaşı   tökürdü . Həyat   yoldaşı  da   sanki   bu   
dərdin    içində   sükuta   qərq  olmuşdu . Növbənin   çox   olduğunu   görən   
ana : - " Balam  can  üstədir , icazə  verin , həkimin   yanına   keçək , vaxtımız  
azdır ! " - deyə , gözləyənlərə   müraciət  etdi . Qucağındakı   körpənin   xırıltılı , 
ağır - ağır   nəfəs   alması    onun   gözlərində  bir   imdada   dönmüşdü . Amma   
növbədə   gözləyənlərdən   qarşılıq   belə   olmadı . Əksinə , " növbəni   gözlə ,  
biz   səhərdən    gozləyirik "  deməsi    yeri - göyü  göynətdi . Düşündüm : 
- " Bumu    İNSANLIQ ?! Bumu   HƏYAT ?! "

     Nəhayət , uzun - uzadı   cəhdlərdən   sonra   həkimin    qəbuluna   keçə   
bildilər . Körpəyə   ilk   tibbi   yardım   göstərildi . Övladının   yaşaması , həyatı   
naminə  valideynlərin   tökdüyü   göz   yaşları  və   özlərini   necə   oda - közə    
vurması  hamını   riqqətə   gətirdi ...

     O   gün    xəstəxanada    bir   təzadın   alovlarında    dondu   həyat   gözlərimdə .

Digər   palatada    yenə   ağır   vəziyyətdə   olan   bir   körpə   və    onun    baş

ucunda   oturub   balasının    bapbalaca   əllərindən    tutmuş   gənc   bir   ana .

Bu    mənzərə   daha   acınacaqlıydı . Övladının   başını   sığallaya - sığallaya

kədərə   qarışan   təbəssümüylə   nağıllar   danışan    ana   onu   ovundurmağa

çalışırdı . Ağrılar   içində   qıvrılan   körpə   elə  hey : - " Ana , atam  gəldi ? "

soruşurdu . Ana    isə   bu   sualdan   qaçaraq , körpəsinin   fikrini   yayındırmağa

çalışırdı . Bu   səhnə   düşüncələrimi   tarimar   etdi . Suallar   bürüdü   dörd  bir

yanımı . Sonradan    bildim  ki ,   körpənin    atası    eyş - işrətə   uyaraq    ailəsini  

dağıtmış , övladının    adını   belə   unutmuş !!!

 

     Aman   ALLAH ! Üç    yaşlı    bir   körpənin    dilində  " ata "     kəlməsi

sevgiylə , ümidlə , arzuyla    dillənir , " ata " nınsa   ağrılar   içində    qıvrılan

balasından   xəbəri   də   yox !!!

    HƏYAT ...  Dünəni , bu   günü    və    sabahları    özündə   birləşdirən

mübarizə   meydanı ...  HƏYAT , hər   birimizin   rol   aldığı    böyük   bir

səhnə ...   HƏYAT , ən   əsası    yaşayaraq   YAŞATMAQDIR !..  

     Məsum    gülüşləri    əzablarla   rənglənən   İKİ   QIĞILTI   keçdi

gözlərimin   önünüdən . Bu   fani   dünyamızda    milyonlarla    belə   inildəyən

qığıltılar  var . Təəssüflər   olsun  ki , həyatda   çoxları   ana   və   ata   olmağın

səadətini ,  valideynlik   şərəfini ,  məsuliyyətini , vəzifə   və   borclarını   hələ

də   dərk   etmir ...

     Yazımı   kiçik   bir   hekayə  ilə   bitirmək   istəyirəm .

     " Bir    gün   bir   körpədən   soruşurlar :

     - Sənin   niyə   iki   əlin   var ?

      Balaca   şirin - şirin   gülümsəyərək    cavab   verir :

     - Biriylə   ANAMIN , o  birisiylə   ATAMIN   əlindən   tuta   bilməkçin    RƏBBİM

mənə    iki   əl   verib ! "

     Qoy , uca  YARADAN   heç  bir   körpənin   əllərini   boş   qoymasın ,  arzusuyla ,

                                                                      YAQUT      HÜSEYNOVA        

Daha bir " Blogger`s Camp " reallaşdı .

    İREX  ( Beynəlxalq    Tədqiqatlar    və   Mübadilələr    Şurası )    
təşkilatının    " Azərbaycan    Yeni    Media "  (  " Azerbaijan    
New    Media    Project "  )  layihəsi     çərçivəsində    bu    günlərdə     
paytaxtda    bloqçular    üçün    üçgünlük     təlim - Blogger`s    Camp    
reallaşdı .  Onu    da   qeyd    edək  ki ,  sessiya    Milli    Mətbuat    
gününə   həsr   olunmuşdu .  Campın    tərkibi    jurnalistika     
sahəsində   çalışan ,  bloqçuluq    fəaliyyətiylə    məşğul    olan
və    xəbər     portalı    idarəçilərindən    ibarət    idi . Təlimə    
əvvəlcədən    respublika    üzrə    elan    olunmuş    seçim   
turlarından    uğurla    keçmış    bloqçular    cəmlənmişdi . 
    USAİD  (  ABŞ    Beynəlxalq    İnkişaf   Agentliyi  )  tərəfindən    
mailiyyələşdirilən    "  Blogger`s    Camp "   ın    proqramı     da
çox    zəngin    oldu .  Sessiyada     təlimçi    Əli     Novruzovun , 
İlqar    Mirzənin     " Uğurlu    Blog " ,  Vüsalə     Əlibəyli ,
Vüqar    Məmmədovun    təqdimatında    " Multimedia    təlimi " ,
" Media   hüququ "   Ələsgər    Məmmədlinin     məruzəsində
dinlənildi .  " Bloqların    məşhurlaşdırılması "     və    " Yeni
Mediada    peşə    etikası    məsələləri "    də    təlim    zamanı
müzakirə    olundu .  Məşhur    bloqer   Adnan   Hacızadə    ilə
görüş    " Blogger`s     Camp " ı    daha    unudulmaz   etdi .
   ( P . S .  Qeyd     edək   ki ,  Şirvan   şəhərini    sessiyada
yaqutvafiqqizi.blogspot .com    bloq   saytıyla    Yaqut    Hüseynova
və   Şirvan   İcma    Məlumat   Mərkəzinin   rəhbəri    Alma
Cəfərova    təmsil   edirdi . ) 


                                                     YAQUT          HÜSEYNOVA  

......... 6 ay 20 gün..........

 Cəmi   6  ay   20   gün    çəkdi    bu   evliliyin   ömrü .  Tanrı     sevgisi ,  

Vətən    məhəbbəti     " İLHAM    və    FƏRİZƏ "   adlı    ülvi    eşq  

dastanının    nurlu    sətirlərinə     dönərək ,  əbədiyyət    üfiqlərində

doğan    Günəş    kimi    sönməz    şəfəqlərini   hər   bir   ürəyə  yaydı .

Sonsuzluğa    vardı    bu   iki   gəncin   sevgi     dünyası .  Ülvi   məhəbbət ,

dərin    hörmət    və    sədaqətin    işığında    əl - ələ    addımladılar    sevda

yollarında .  Qara    torpağa    da    birgə     baş   qoydular .

     " ŞƏHİDLƏR     XİYABANI " ...    Neçə - neçə    Vətən    övladının
uyuduğu    müqəddəs   ziyarətgah .  Daş    məzarlardan    boylanan  
baxışlarda    nə   qədər    yarın    qalmış    talelər    dillənir .  Bütöv
AZƏRBAYCAN    naminə    şəhid    olmuş    igidlərin    qara   torpağa
tapşırıldığı    bu   xiyabanda    ilk    məzar   Fərizə   və    İlhamındı .
Neçə - neçə    qönçə   arzularla   bəzəmişdilər    qurduqları    ailəni . 
Şirin    xəyalların    gerçəyə   dönəcəyi    hələ   nə    qədər   gözəl
günlər   qarşıdaydı .  Amma    düşmən   gülləsi    bu    sevgi   nağılını
göz    yaşlarıyla    bəzədi .
       İlhamın    şəhid    olduğunu   eşidən    Fərizə   elə    hey ,  " İlham ,
mən   sənsiz    yaşamayacam ! " ,  " Söz    verirəm ,  yanına   gələcəyəm ,
sənsiz     mənə   həyat    yoxdur ! "    deyirdi .  Öncə    Xırdalan   
qəbiristanlığında    torpağa    tapşırılan   İlhamın     nəşinin    iki    gün
sonra  ( 22  yanvar  1990 -  cı  il )  " ŞƏHİDLƏR    XİYABANI "   na     
köçürülməsi   qərarlaşdırılır .  Həmin    gün    səhər     saat   5 - 6    
radələrində  Fərizə    əhdinə    sadiq    qalaraq    özünə   qəsd    edir .  Və     
çox   sevdiyi    İlhamına   əbədi   qovuşur .  And   yerimiz    olan     
" ŞƏHİDLƏR   XİYABANI " nda  ilk   məzarda  öz   ölümüylə  sevgisini    
ölümsüzləşdirən     FƏRİZƏ    uyuyur ...

       30  iyun - " Sevgililər  günü "   dür .  Sevənlərin     unudulmaz    və
əziz    günü .  Qoy ,  bütün    sevənlərin    dilində   " SEVİRƏM ! "  
kəlməsi     çiçəklənərək    gözlərində    bərq    vursun .  Sevgi   
yağmurları    aydınlatsın    könül    dünyamızı .
       Yazımı    şəhid   İlhamın    anası    Ofeliya    İbrahimovanın    bir    
müsahibədə   söylədiyi    fikirlərlə   bitirmək    istəyirəm .  Ofeliya    ana    
qəlbinin   ağrısını    dilə   gətirərək    qeyd    edir : - " Üzümü    bütün   
gənclərə  tutaraq    tövsiyə    edirəm   ki ,  onlar   təmiz    sevgi   üzərində    
ailə   qursunlar .  Və    İlham    kimi ,   Fərizə    kimi    öz    sevgilərinə
sadiq     olsunlar .  Gənclərə    İlham    və    Fərizə    taleyi     yox ,
 İLHAM    və    FƏRİZƏ    MƏHƏBBƏTİ    arzulayıram ! "



                                      YAQUT     HÜSEYNOVA
     
       

NƏFSƏ DƏYİŞDİN !

   Son    görüş    günündən    illər    ötübdü ,
   Sinəmdə     intizar ,  həsrət    bitibdi ,
   Sevincim     kədərdə ,  qəmdə    itibdi ,
   Sən     təmiz    sevgimi    nəfsə    dəyişdin !



                            Hicran    mənzilinə    yetişdi   qəlbim ,
                            Tükəndi     dözümüm ,  tükəndi     səbrim .
                            Xatirə     içində     qazıldı     qəbrim ,
                            SƏN     təmiz    sevgimi     nəfsə    dəyişdin !



                                                    YAQUT       HÜSEYNOVA 

DÜŞÜNCƏLƏR .

   Torpaqdan     yarandıq ...  Bir    gün    gələcək ,
   Yenidən     torpağa     dönəcəyik   biz !
   Boğsaq    da    dünyanı    qaranlıq   kimi ,
    Məşəllər    önündə    sönəcəyik   biz !


                 Yaxşılıq    eyləyib ,   qoy ,  daş    altına ,
                 Nə    vaxtsa     həmin     daş     tərpənəcəkdi .
                 Zəhmətlə    yaşa    sən ,  uyma    altuna ,
                 Əməklə     ucalan    enməyəcəkdi .


   Bir      sənət     seçəndə     dərindən    düşün ,
   Sənətdə     sənətkar    olmaq    gərəkdir !
   Beş    günlük      dünyada     yaşa     şərəflə ,
   Öləndə     qəlblərdə    qalmaq     gərəkdir ! 


                  Eşqini      dünyaya     etmə     etibar ,
                  Leylini     Məcnundan     ayırdı     dünya !
                  Bağ - bağça    söyüddən    görməyibdi     bar ,
                  Sazını    nalədən     düzəldib     dünya !


   Ölüm    ayağında ,  axır     nəfəsdə ,
   - " HƏYATDAN    DOYMUŞAM ! "  -  deyən ,  olmadı .  
   Dövləti     başından     aşsa    da     yenə ,
   KƏFƏNİ     XARADAN     geyən    olmadı !


                                                    YAQUT      HÜSEYNOVA
 

BİRİNCİ ZƏNG .

     Bax ,  səslənir    birinci     zəng ,
     Dəcəlliyin     sona    yetir .
     Məktəblisən ,   dünyan    qəşəng ,
     Həyat     səni     təbrik     edir .


                               Çiynindəki     çantan    ağır ,
                               Körpə    quzum ,  gücün    çatmır .
                               Üz - gözündən    sevinc    yağır ,
                               Elmə    gedən     yol    qurtarmır .


    Əlindəki     qızılgüllər ,
    Məktəbinə    salamındı .
    Şagird    ömrü - qızıl    günlər ,
    Vətən - ilkin     kəlamındı .


                                 İlk     müəllimən ,   səni    quzum ,
                                 Qarşılayır     gülə - gülə .
                                 Bu     gün    sənə    budur    arzum :
                                 - " Elm    bağında    dön   bülbülə ! " 



                                             YAQUT        HÜSEYNOVA  

UYUYUB ...

     Yazılan      taledən     qaçmaq     olmayır ,
     Uyuyub     işığı ,  nuru    gözümün !
     Kədər    də     çiçəkdir ,  ancaq    solmayır ,
     Uyuyub     işığı ,  nuru    gözümün !


                                  Sönübdü     gözlərim ,  yanan     qor    deyil ,
                                  Şərbətdi     giryanım ,  daha    şor   deyil ,  
                                  Gözüm     kor     olsa     da ,   qəlbim    kor    deyil ,
                                   Uyuyub      işığı ,  nuru    gözümün !


                                              YAQUT        HÜSEYNOVA

SEVGİLİLƏR AYRILANDA .

     Göy     üzünü     bulud    alar ,
     Sevgililər    ayrılanda !
     Ürəklərdə    ümid    qalar ,
     Sevgililər    ayrılanda !


                                           Gözlər     azar    cığırlarda ,
                                           Sevinc    donar   yağan    qarda ,
                                           Segah     dilə    gələr    tarda ,
                                           Sevgililər     ayrılanda !



                                                            YAQUT       HÜSEYNOVA

SON MƏKTUB .

      Mən    ötən    hər   anı ,   günü    sayarkən ,
      Yazdın    son    məktuba : - " Yoxsan    mənimçin ! "
      Hər     yerdə ,   hər    yanda    səni    ararkən ,
      Yazdın    son     məktuba : - " Yoxsan    mənimçin ! "



                                 Bir    mizrab    olmusan     könül     tarıma ,
                                 Çevrildin     baharda    sevgi    qarıma ,
                                 Sən     nöqtə     qoyaraq    arzularıma ,
                                 Yazdın      son     məktuba : - " Yoxsan    mənimçin ! "



                                              YAQUT      HÜSEYNOVA 

HƏDİYYƏM ...

     Sən    gəldin     ömrümə     sevgi    payım    tək ,
     Qaranlıq     gecəmə    nurlu    Ayım     tək ,
     Sən     gəldin     dünyama    günüm , ayım    tək ,
     Hədiyyəm ,  sevgimdi     doğum    gününə !



                            Baxışlar     dəyişmir ,  zaman    ötsə   də ,
                            Ilk    sevgi    əbədi     hicran    yetsə   də ,
                            Sənsizlik     içimdə     tufan     etsə   də ,
                            Hədiyyəm ,   sevgimdi     doğum    gününə !

                                                   
                                                               

                                                     YAQUT     HÜSEYNOVA   

QAYIT , GƏL ...

     Hayana     baxıram    səni     görürəm ,
     Həsrətdən    telimə    çələng     hörürəm ,
     Divanə    könüllə    ömür    sürürəm ,
     Qayıt , gəl ,   ömrümə ,  qayıt ,  sevgilim !


                           Nədir     üzündəki    küskün    baxışlar ,
                           Bu    hüsnün    qəlbimə     kədər    bağışlar ,
                           Fələklər     qisməti      yazar ,   naxışlar ,
                           Qayıt ,  gəl ,  ömrümə ,  qayıt ,  sevgilim !


     İçimdə     nə     qədər     ağrı - acım     var ,
     Kədərdən     qurulan     taxtım - tacım     var ,
     Sevginə     əbədi    ehtiyacım     var ,
     Qayıt ,  gəl ,  ömrümə ,  qayıt ,  sevgilim !



                                             YAQUT     HÜSEYNOVA
                               

İLLƏR OLDU ...

 İllər    oldu     ayrılanı ,
 Gəl ,  bitirək ,  həsrəti   biz !
 Dönək , sevgi    dünyamıza ,
 Gəl ,  bitirək , həsrəti    biz !

  
                         Bir    döyünür    ürəyimiz ,
                         Səadətdi    diləyimiz ,
                         SEVGİ     olsun    gərəyimiz ,
                         Gəl ,  bitirək ,  həsrəti    biz !


 Budur ,  gəldi     çiçəkli     yay ,
 Güldü    Günəş ,  sevindi    Ay ,
 Dualarım     saldı     haray ,
 Gəl ,  bitirək ,  həsrəti    biz !

                        
                         Sevdim  səni  sonsuzadək,
                         İnamından   dumanı  çək,
                         Sənsiz, inan,  qalmışam  tək,
                         Gəl,  bitirək  həsrəti   biz !



                        
                                            YAQUT      HÜSEYNOVA 

Qurbanam , ana !

                     Dünyadan    34    yaşında    getmış   nənəm    Zəhranın
                                   əziz    xatirəsinə    ittihaf   etmışəm . 

   Baxıb    məzarına    bəmdən     ağlaram ,
   Yatdığın    torpağa     qurbanam ,  ana !
   Od    olub    dünyanın     bağrın     dağlaram ,
   Yatdığın     torpağa     qurbanam ,   ana !


                  Gəlmişəm ,  ay     ana ,   ziyarətinə ,
                  İnsaf     et ,  oyan     sən ,  baxım     üzünə ,
                  Bu    şikəst    ürəyim    möhtac    sözünə ,
                  Yatdığın     torpağa     qurbanam ,  ana !


  Çiçəkdən    hörülən    çələng    olaydım ,
  Qəbrinin     üstünə   kaş     qoyulaydım ,
  Solub    torpağına    mən    qarışaydım ,
  Yatdığın     torpağa    qurbanam ,  ana !


                                                    YAQUT    HÜSEYNOVA  

SORUŞ

     Deyirsən ,   lal     kimi    durmusan ,   yenə ,
     Soruş ,   gözlərimdən    məhəbbətimi !
     Qəlbimi    qoparıb    vermışəm    sənə ,
     Soruş ,    ürəyimdən   məhəbbətimi !


                                    Göydəki     ulduzlar    gəlməyir     saya ,
                                    Qəlbimdə    cücərən    arzular     kimi .
                                    Gündüzlər     Günəşə ,   gecələr    Aya ,
                                    Mən    həmdəm    etmişəm     təmiz    eşqimi .



                                                          YAQUT      HÜSEYNOVA   

SƏNDƏN SONRA .

     Səndən    sonra    əllərimdən ,
     Hicran   tutdu ,  kədər    tutdu !
     Həsrət   qara    tellərimdə , 
     Bəyaz    qardan    betər   tutdu !


                                   YAQUT     HÜSEYNOVA

...................................nəyindən küsüm ?!

     Doğrayıb ,  çox    qəlbi    söz    yarasıyla ,
     Mən   belə   dünyanın   nəyindən   küsüm ?!
     Ucaldıb    namərdi ,  endirib   mərdi ,
     Mən    belə   dünyanın    nəyindən    küsüm ?!



                                            Yalanı    bilinmir ,  düzü    bilinmir ,
                                            Göynəyən    gözlərin    yaşı    silinmir ,
                                            Haqsızlıq     önündə   lal    olub    dinmir ,
                                            Mən     belə    dünyanın    nəyindən   küsüm ?!




                                                                    YAQUT     HÜSEYNOVA  

YAĞ , SEVGİ YAĞIŞIM , YAĞ !

     Dəli    külək    əsir .  Yağmur    öz    həzin    nəğməsini    damla - damla 
ürəyimin    hər    döyüntüsünə   köçürür .  Narın    damlaların    altında
düşüncələrim ,  sanki    cilalanır , ruhum   rahatlıq    tapır .  Rüzgarları ,
yağmurları , bir   də   dənizi   çox   sevirəm .
     Yağmurlu    yollarda    adlaya - adlaya   yenə   də    ürəyim   SƏNİNLƏ
həmsöhbət    olub .  Yenə   qəlbimdəki    təmiz    sevginin    al   şəfəqlərinə
boyanıb,  həsrətli    yollarda    azıb    qalan   gözlərim .  Yollar ,  bəlkə  də
SƏNİ    gözləməkdən     yorulub - usanacaq .  Mənsə   əsla .  Əbədi   
duyğularımı    misralara    düzə - düzə     SONSUZLUQDA    yox   oldum .
Amma    çox   xoşbəxtəm .  Çünki    bu    " yoxluq "     ƏBƏDİYYƏTƏ
VARMAQDIR !
     Yağan     yağmur     damlalarına     qarışıb    göz    yaşlarım .  Yağ ,  
sevgi     yağışım ,   yağ !   Qoy ,  həsrətdən     cadar - cadar    olmuş
qəlb    torpağımda    min   ARZU ,  bir    ÜMİD     cücərsin .  İşıqlansın ,
ömür    karvanımın     adladığı    enişli - yoxuşlu   yollar ...

                                                  YAQUT      HÜSEYNOVA  
   

" İKİ DAMLA "

     Sus ...  Qoy ,   qəlblərimiz    danışsın .  Qoy ,   gözlərimiz     danışsın    

ikimizin     yerinə .  Qoy ,  gözlərimizdə    qığılcım    kimi   doğulub

GÜNƏŞ   tək   parlayan   arzularımız   danışsın !   Dodaqlarımızdakı    gülüş

bölüşsün    SEVGİ    DÜNYAMIZI .  Qoy ,   bu   lal    sükutu    könlümüzü

layla    həzinliyilə    oxşayan    məhəbbət    yeli     pozsun .  Qaranlıq   

gecədə   bərq    vuran    ulduzlara    dönsün   ümidlərimiz .  SEVGİ   

yağmurlarında    birgə    addımladığımız     yollarda    TANRININ    

xeyir - duasıyla  nurlansın    ülfətimiz .  SEVGİ    hekayətimizin   

ömrü    yağan   yağmur   damlalarının    sayı     qədər    SONSUZ    

olsun .  ƏBƏDİ     EŞQ   adlı   səfərə   çıxaq .  Və    bu    yol    

fani   dünyamızla    əbədi    həyatımızı - axirətimizi    birləşdirəcək    

sirat    körpüsünə    çevrilsin .

     Göylərə    açılan    əllərimiz    etdiyimiz     duaların    nuruyla
qabarlansın .  Maddi    varlıq    olmaqdan    qaçaq .  Mənəviyyat    
əbədiyyətinə    varaq .  Cəhalət   bataqlığında     deyil , SEVGİ   dənizində  
azaq .  İKİ    DAMLA     tək    yox    olaq ,   səadət    dalğalı    sevda
dənizində .   Sultan   Süleymana    qalmayan ,   yalanlar    içində     
alovlanan    fani    dünyadan    əl    çəkib ,  ilahi   eşq    aləminin   
sonsuzluğunda    var   olaq .  Açıb    gözlərimizi    diqqətlə   baxaq , 
YER    ÜZÜNƏ .   Aldanmayaq , beş    günlük    dünyanın   
cah - cəlalına . Saf   niyyətlərlə    zinətləndirək   qəlbimizi ,  
xeyirxahlıqla   sətirləndirək    əməllər    kitabımızı .
      Həyatın     son     nöqtəsi    qoyulan    məzar    daşlarına     
diqqətlə    nəzər   salaq   və    düşünək .  Düşündükcə   dərk    
edək ,   yaradılışın    mahiyyətini . Aləmlərin   Rəbbinə    şükr    
edək ,  günahlarımızı ,  səhflərimizi   etiraf   tək   gözlərimizdən   
axan    yaşlara    düzək . Dünyanın    pozulmaz    qanununu ,  
danılmaz     həqiqətini    təbəqələşən    bəşəriyyətə    dönə - dönə    
xitab   edək :


                          Ölüm    ayağında ,  axır   nəfəsdə ,
                          HƏYATDAN   DOYMUŞAM ,  deyən   olmadı !
                          Dövləti    başından    aşsa    da    yenə ,
                          KƏFƏNİ      XARADAN    geyən     olmadı !   
                                                      
                                                           ( müəllif : Yaqut   Hüseynova ) 


     Bu    yerdə    Cibran    Xəlil    Cibranın    həyat      haqqında    
söylədiklərini    xatırlamaq    yerinə    düşər : - " Mən    insanları    
sevmişəm ...   Mənim   qanunumda   insanlar    üç   qisimdir ;  bir  
qisim - həyatı    lənətləyir , bir    qisim - ona , " EŞQ    OLSUN ! " ,  
deyir ,   bir    qisim   də    onu    dərk    edir .  Birinciləri    bədbəxtliyinə    
görə    sevmişəm ,   ikinciləri    ülətinə    görə ,   üçüncüləri     isə    
müdrikliyinə    görə ...  "  
    Qoy ,  UCA    YARADAN   bizləri   üçüncülərdən    etsin , AMİN !
Mənəvi   varidat   arzsusuyla ,  YAQUT    VAFİQQIZI !

" DAN YERİ ... "

     Həzin    səhər   küləyi   əsir . Ağuşuna   sığındığım   salxım    söyüdlər   tək
sənin  adını    pıçıldadı   mənə .Tək   SƏNİN   ADINI !  Söyüdlərlə   
əhatələnmiş    nohurun    füsunkar   mənzərəsini   içimə   çəkə - çəkə   
yenə    kağız     qələmlə   bölüşürəm     ürəyimin    döyüntüsün . Masmavi   
səma  da   bu   gün   başqadı . DAN   YERİNİN     qətrə - qətrə   necə   
söküldüyünü   izləyirəm . Hər   yan   yenicə   doğan   günəşin    al   
şəfəqlərinə   bürünüb . Ruhuma   damla - damla   süzülən   AZAN   səsinin 
hüzuru   təbiətin   bu   əvəzolunmaz    gözəlliyini    daha   da    ülviləşdirir .

        Xəyallar    dumanı    sarıb   dördyanımı . Şirin   arzular   gözlərimin 

nurunda    dil   açaraq ,  qəlbimi    sətirlərə   köçürə - köçürə    mənimlə 
həmsöhbət    olub . Dərin    sükut     içində    qələmim   ağ   kağızlarla    
danışır . Səhərin   həzin   nəğməsindən    süzülən    ümid   dolu   ahəng    
bəyaz     vərəqlərin    köksündə  karvan    tək     yola     çıxan    könül   
duyğularımın   yoluna ,  sanki    bir  işıq  tutur...    
       " Bir   yol    gedirik   səssiz - səmirsiz .  Bir    yol    gedirik    dünəni   
bəlli ,  SABAHLARI     bir    tapmaca .  Anbaan    addımlarımızla    
qısaltdığımız   bu    yol ,  TALE    YOLLARIDIR ... "

                                                       

                                                          YAQUT    HÜSEYNOVA

" ANAMI VƏ SADİQİ XATIRLADAN TƏQVİM ... "

           
       " Üçrəngli    bayrağımızı   biz ,   Qarabağda   göylərə   əbədi    
ucaldacağıq ! "   Bu    kəlmələr    onun   qəlbinin   döyüntüsüydü .  
Hərbiçi    olmaq ,  Vətənə   layiqincə   xidmət    etmək    ən    böyük    
arzusuydu .  Hələ    məktəbdə   oxuduğu    illərdə    ibtidai    hərbi
hazırlıq    dərsinə    böyük    həvəs    və    məsuliyyətlə    yanaşar ,
müəllimindən    hərbi    incəlikləri ,  xüsusən    silahların   " dilini "
öyrənməyə    səy    göstərərdi .   Təbiətcə    sakit    olsa   da   çox
çılğın    idi    Sadiq .  Yaşasaydı    martın    biri     22     yaşı   olacaqdı .
Sadiq     ailəmizin   sonbeşiyi ,   yeganə    qardaşımız    idi .  Zəhməti
çox   sevirdi .  Yaxşı    yadımdadır ,   ailəmizin    ən    çətin    
məqamlarında     yaşının     az     olmasına    baxmayaraq , 
işləyərək     atama    kömək     edərdi .   Öz     dünyası     vardı .  Şirin
arzulardan     qurduğu    gözəl    bir    dünyası .  İdmanla   məşğul
olurdu .   Arzuları     sonsuz    idi .   Həmişə    deyirdi    ki ,   hərbi
xidməti    yerinə    yetirdikdən     sonra    Məşhədə    ziyarətə
gedəcək ,  bacım   Lamiyyəni   də    özüylə     aparacaq ... "

     
    Ləman     qardaşını    xatırlaya - xatırlaya    qəhərə    qərq    oldu .   
Gözlərindən     süzülən     damlalar     kədərdən    bir    anlıq    donmuş
dodaqlarındakı     ürək    yanğısını    tamamladı .  Köks   ötürərək    
sözünə     yenidən     davam    etdi :
        - " 2009 - cu     il    ailəmizə    iki    böyük    itkini    yaşatdı .  Öncə
anamı     iyun     ayının     29 - zu     itirdik .   Qardaşım      Sadiq    yasın
üçüncü     gününə    yetişə    bildi ,   onun   qəfil    ölümüylə     barışa   
bilmirdi .  Yaralı   quş    tək    çırpınırdı .

       
       Sadiqin     əsgərliyə     getdiyi     günü     xatırlayıram .  2007 - cı
il    aprelin    biri     onu    hərbi      xidmətə    yola     saldıq ,  çox  
sevinirdi .  Arzusu     cəbhə     bölgəsində     xidmət    etmək     idi . 
Atalar     yaxşı     deyib : " Niyyətin    hara ,  mənzilin    ora . "  
Tez - tez     komandirindən    təşəkkür     məktubları    alırdıq . Kiçik
çavuş   idi .  Anamın    qırxından     25    gün    keçmişdi .  Qəlbimiz
əzablar    içində    göynəsə    də    bizi     bir    ümid ,  bir    sevinc     
yaşadırdı .  Sadiqin    hərbi    xidmətini     bitirib      yanımıza     
qayıtmasını      səbirsizliklə     gözləyirdik .   Sayılı     günlər    qalmışdı .
Hər     gün     təqvimdən    bir    yarpaq    düşürdü .  Anam     Sadiq   
gedən     gündən    təqvimin    ötən    hər    gününü    qeyd     edirdi .
Amma     amansız      ölüm     bu    təqvimin     tamamlanmasına   
imkan    vermədi .  Bu    gün    həmin    təqvim    anamdan    bizə  
qalmış     acı     xatırələrimizdəndir .  2009 - cu    il    sentyabrın    
5 - iydi .   Qardaşımın     gəlməyinə    25    gün    qalmışdı .  Sadiqin   yerinə
qapımızı     onun    ölüm     xəbəri    döydü .   O     Ağdamın    Yusifcanlı
kəndində     şəhid    oldu .   İndi     anamla     birlikdə    Şirvan     şəhər

qəbiristanlığında      uyuyur .  "

         
           Tanrının    yanında     şəhidlər    diri ,
           Vətənçin     ölənə - ölü     deyilməz !
           Onların     yatdığı    torpaq ,  and    yeri ,
           VƏTƏNçin    ÖLƏNƏ - ÖLÜ   DEYİLMƏZ !
       Şəhidlər    ölmür .   Atayev    Sadiq    Seyfi    oğlunun     adı    VƏTƏN   
tarixinin     şanlı     səhifələrinin    birində     əbədi      yaddaşlara    köçdü .
ALLAH     cəmi     ŞƏHİDLƏRİMİZƏ     RƏHMƏT    ELƏSİN !




                                                           YAQUT      HÜSEYNOVA 

QƏRƏNFİL ƏTİRLİ GECƏ ...

     Qərənfil      fırtınalı     gecədən     artıq     22    il      ötür .  Yenə      hər  
 yan      qərənfil      ətrinə     bürünüb .  Yaddaşımızı ,   ürəyimizi    qanlı     
şənbə   gecəsinin      şaxtası    bu    gün    də     qılınc     tək    kəsir .
Yaddaşımız      da    düşüncələrimiz    tək    qərənfil    yağışına     tutulub .
Qərənfillər    içində     itib    addımladığımız    yollar .  Bir      zamanlar    
sevgililərin     sevimli     gülləri     olan   al    qərənfillər   bu  gün  tamam    
başqadır .  Onlar     daha     sevgi ,  məhəbbət    nidalı     deyil .  Məhz     o    
qanlı     şənbə    gecəsində     al     qərənfillər ,   mübarizlərin      cihad    
simvoluna     çevrildi .
     Yaddaşımızın     20   yanvar    səhifəsi    131    şəhidin    adıyla   yazıldı .
Tarix    yenidən     yaşandı .  Dünən    bir    daha    təkrarlandı .  O    gün 
mürgülü     yaddaşımız    da     silkələnib     oyandı .  Azadlıq     deyə ,
hayqırdı     ürəklərimiz .  Əliyalın     olsaq     da    canımızla ,  qanımızla
istiqlaliyyət     uğrunda     irəlilədik .  Odlu     silahların ,  zirehli   
tankların     altında     xıncım - xıncım      əzilsək    də     geri    
çəkilmədik ,  əyilmədik .   Qəlbimizdəki      AZƏRBAYCAN     boyda
VƏTƏN      sevgisinin     gücüylə      qana    boyanmış     gecədən
açılan      səhərin      al     şəfəqlərinə      qovuşduq ...

        Deyirlər ,   yazılan    taledən    qaçmaq    mümkün    deyil .  Qanlı
şənbə     gecəsində      bunun     bir     daha      şahidi     olduq .
Qərənfillərin      də    taleyi      dəyişmədi .  Əbədi     and     yerimiz
olan     " ŞƏHİDLƏR     XİYABANI "  nda      uyuyan     
İLHAM     və     FƏRİZƏ      adlı     məhəbbət     dastanını   sevgi      
çələngi     tək     bəzəyən     qərənfillər ,   ilahi    eşqin   qəlbimizdə     
nurlandırdığı     elə     bir     sönməz     məşəldir     ki ,   daim     
İSTİQLALİYYƏT      nəğməsi      kimi     dilimizdə    səslənəcək !


                          Tanrının      yanında     şəhidlər     diri ,
                          VƏTƏNÇİN     ölənə - ölü     deyilməz !
                          Onların     yatdığı      torpaq ,   and    yeri ,
                          VƏTƏNÇİN     ölənə - ölü    deyilməz ! 

                                          

                                          Fərizə    andına ,  İlham   eşqinə ,
                                          Vağzalı     üstündə     yasin    oxundu !
                                           Məhəbbət    nidalı     qərənfillərə ,
                                           Vağzalı     üstündə     yasin     oxundu !


       DÜNƏNDƏN       SABAHA      yol     gedirik .  Tarixin     keşməkeşlərinə     
sinə     gərərək ,   dünəndən    sabaha    addımladığımız    cığırın    körpüsü,
məhz      bu     gündən     keçir .  Bu     körpüdə     inamla     addımlamalıyıq.
Çünki     BU     GÜN     adlı     bu     körpüdə     milli     ruha    köklənən
VƏTƏN     sevgisi      və     QALİBİYYƏT      qətiyyətiylə     atdığımız
hər    addımın    izi ,    tarıxın     daş    salnamələrinə     naxışlanan     möhür
kimi      dünənimizi      yaşadan    sabahlara     sakin     edəcək     bizləri !






                                                     YAQUT       HÜSEYNOVA