“ DUYĞULAR, DÜŞÜNCƏLƏR... “

“ ŞƏHİDLƏR XİYABANI, yalnız faciə günlərində gedilən yol deyil. “

“ Gənclikdə görmədiyin, səsinə qulağını kar etdiyin HAQQI, illər sonra ulasan da tapa bilməyəcəksən. “

“ Hər uğur hekayətinin, uğur əhvalatının təməlində həyata keçməyən bir ARZU dayanır. “

“ XOŞBƏXTLİK-mənən və fizikən aldığımız rahat nəfəsin VƏHDƏTİNDƏN başlayır.”

“ Cəmiyyətin xəstə və cahil düşüncəsin, yanaşmasın, diktəsin dinlədinsə ÖZÜNÜ UNUT, daha doğrusu, DİRİ-DİRİ İÇİNDƏ DƏFN ET ! “

“ GÖZƏLLİK-insanın ruhundan başlamalıdı. Ruhu zülmət olanın zahiri heç bir zaman işıq saça bilməz. “

“ Bəzən yol eyni olur. Amma istiqamət fərqli. İnsanları bir-birindən uzaqlaşdıran ya QÜRURU, ya da FƏRQLİ DÜNYAGÖRÜŞLƏRİ olur. “

“ FİZİKİ YORĞUNLUQ keçər, yaralar sağalar izi qalsa da. YORULMUŞ və YARALANMIŞ RUH isə dincliyini heç vaxt tapmaz. “

“ İnsan düşmən danışanda, dostlar susanda daha güclü olur. “

“ QƏLƏMİ-əlinlə deyil, ürəyinlə tut, ruhunla duy. “

“ Əsl səadət odur ki, həyatında şirin nağıllarını vərəqləyən bir mələyin var... “

“ Hər fəslin öz gözəlliyi var; öz istisi, öz küləyi, öz yağmuru, öz nəfəsi, ən əsası öz GÜNƏŞİ var.”

“ Əqidən dəyişirsə, deməli İNSAN deyilsən. VARLIĞIN Yer Üzündə sadəcə say artımının göstəricisidir.”

“ Bir cəmiyyəti məhv etmək istəyirsənsə, DİNİNİ şəkilləndirərək hissələrə böl. Bu hissələrin yenidən heç bir zaman BÜTÖVLÜYÜ olmayacaq. “

“ Əyləncə gözəldir. Amma əyləncə o zaman daha gözəl olur ki, onun içində bilgi və məlumatlandırma var. “

“ İctimai mühit hər bir yerin, ölkənin, şəhərin varlığının əlifbasını tanıdır hər kəsə. Bu əlifba elə mükəmməl qurulub ki, hərfləri olduğu kimi ifadə edir görüntü və yanaşmaları. Nə qədər mübaliğələrdən istifadə olunsa da.”

“ Nə istifadə et, nə də istifadə olunmağına izn ver. Özünü yaratmaq istəyirsənsə, bunu bacarmalısan. Yoxsa, üzsüz cəmiyyətin kopyalarından birinə dönərsən. “

“ UĞUR- zəhmət və məsuliyyətin nəticəsidi. Təəssüf ki, zəhməti başqasının olanları öz uğuru sayanlar da var. Bu uğur deyil, mənəvi axsaqlığınız və ən böyük məğlubiyyətinizdir! “

“ Vəzifə insanın dəyərli və savadlı olduğu anlamına gəlmir. Kimi vəzifəsinə görə hörmətli olur. Elə vəzifələr də var ki, ona sahib olanlara görə dəyərlidir.“

“ Ustadının, böyüyünün dəyərini bilməyən gəncliyin atdığı addım hər an büdrəyər, SABAHLARI isə heç vaxt böyüməz. “

“ Yaxşılıq adlar hallansın deyə yox, insanlıq naminə edildiyi zaman uğurlu olar. “

“ Qələmin ucu və dəftərin sətirlərindən başlayır yenilməzliyin gücü. “

“ Zəhmətlə qazandığın uğur günəş tək şəfəqlərinə boyayar addımlarını. Vasitələrlə əldə edilənlər isə kölgə damğasını vurar adına. “

“ Altı şəxs əvəzliyi olsa da, təəssüf ki, çoxunun tanıdığı “MƏN” di, daha doğrusu, MƏNƏMLİKDİR!!! BİZ varlığını var etmək bu qədərmi çətindir ?! “

“ Əzib keçmək, tapdayıb irəliləmək... Bunu həyat tərzinə, vərdişə çevirənlər unutmasınlar ki, əzib keçdikləri, tapdadıqları ayaqlarını yox, vicdanlarını elə parçalayar ki, atdığı hər addım ƏQİDƏSİ AXSAĞIN izi kimi tanınar. “

“ Vəzifəni itirmək qorxusuyla boğulan, miskinləşən “ mənliklərə “ nifrət etmək də çoxdur. Çünki nifrətin özündə də bir QÜRUR var. Onlara yazığım gəlir. “

“ Kökündən ayrılan çıxdığı yolda nə irəli gedə bilər, nə də geri qayıdar. “

“ Sətirlərində ruhunu baş sağlığı və itkilərə öyrətdiyimiz VƏTƏN... “

“ Adı yox, özü “ODLAR YURDU” na dönən VƏTƏN “

“ Musiqinin hopmadığı nə yazı, nə də söz təsirli ola bilməz. Heç bir ürəkdə o doğmalıq tapa bilməz.“

“ Yaralara duz axtaranlardan yox, məlhəm edənlərdən olaq. “

“ Yarımçıq yazılar qədər ağrılı məqam yoxdur qələm sahibi üçün. Bitirmək istəsən belə çox vaxt bitirə bilməzsən yazdığını. İstədiyin nəticəni almaq üçün bəzən aylar, hətta illər keçər...”

“ ZƏHMƏT-ruhun ətridir. “

“ Ömür illərlə pillələnir, illərsə HƏDƏFLƏRLƏ dəyər tapır. “

“ HƏYAT-iki fərqli qolda tarazlanan bir təzaddır. “

“ YER KÜRƏSİNİ çox vaxt MARS planetinə bənzədirəm. Marsda su və torpağın qalıqlarına rast gəlindiyi kimi, yer üzündə də İNSANLIĞIN qalıqlarını görmək mümkündür. “

“ Bir insanı məhv etmək istəyirsənsə, yalnız və yalnız onun RUHUNU öldür! Bir də unutma, RUH əqidəli insanlarda olur, VİCDANI KƏMLƏRDƏ YOX ! “

“ Axının əksinə getmək... İnsanın əksinə getməyinə səbəb, ədalətsizlik və haqsızlıqlardan qaçaraq aradığı həqiqətdə yox olmaq istəməsidir.”

“ İNAM və GÜVƏN ümidlərin doğrulduğu zaman yaranar.”

“ İrəli getmək və özün olmaq istəyirsənsə, ayağına dolaşan sarmaşıqlara addımını tanıtmağı bacarmalısan ! “

“ Səhvə öyrəncəli addımların yolları da haçalı olar. “

“ Məhz valideyn sevgisi və nəvazişi övladı həyatda yönləndirir. “

“ Sınan ürəyin memarı yoxdur . “

“ Qarşındakına bəslədiyin hörmət özünə hörmətdən qaynaqlanır. “

“ Kimsəni özün kimi düşünmə, çünki çox vaxt fədakarlıq bədbəxtliyə gedən yolun başlanğıcıdır. “

“ Nadanlığa qarşı elm əlində qılıncın, ağılsa qalxanındır. “

“ Hər danışılan yalan qədər, hər atılan iyrənc addım qədər daxili və xarici simanı eybəcərləşdirən ikinci bir şey yoxdur. “

“ Tənqidlərin də səmimi və qeyri-səmimisi olur, TƏRİFLƏR KİMİ. “

“ Bəzən böyük əksəriyyət var olduğunu zənn edir, amma dərk etmir ki, “ belə var olma “ yuvarlandığı, yaxud yuvarlanacağı HEÇLİKDƏN başqa bir şey deyil. “

                                                        

                                    Yaqut Hüseynova